?ts=1764641658989&fmt=webp-alpha&dpr=off)
បើទារកក្នុងផ្ទៃមិនសូវកម្រើក ម៉ាក់អាចដោះស្រាយតាម 6 វិធី
ការកម្រើករបស់ទារកក្នុងផ្ទៃ គឺជាការភ្ជាប់ទំនាក់ទំនងរវាងប៉ាម៉ាក់ហើយនិងកូន ប៉ុន្តែសកម្មភាពមួយនេះ ក៏ដើរតួនាទីយ៉ាងសំខាន់ក្នុងការផ្តល់ជាសញ្ញាថាអាអូនមានសុខភាពល្អផងដែរ។ នៅពេលដែលកូនកម្រើកទៀងទាត់ ក្នុងនាមជាប៉ាម៉ាក់ច្បាស់ជាសប្បាយចិត្តមិនខានតែប្រសិនបើនៅសុខៗទារកក្នុងផ្ទៃលែងសូវកម្រើកដូចមុន ជាពិសេសនៅត្រីមាសទី៣ទៀតនោះ យើងប្រាកដជាត្រូវទៅជួបពិគ្រោះជាមួយនឹងគ្រូពេទ្យមិនខាន។
នៅពេលណាដែលទារកចាប់ផ្តើមកម្រើក?
ជាទូទៅ ទារកក្នុងផ្ទៃចាប់ផ្តើមកម្រើកនៅចន្លោះសប្តាហ៍ទី២០ និងសប្តាហ៍ទី២២ សម្រាប់ម៉ាក់ៗដែលមានកូនដំបូង។ ចំណែកឯម៉ាក់ដែលមានកូនលើកទី២ឡើងទៅ កូនអាចចាប់ផ្តើមកម្រើកលឿនជាងនេះ។
ធ្វើម៉េចទើបឲ្យទារកក្នុងផ្ទៃកម្រើកញឹកញាប់ជាងមុន?
១. ញ៉ាំភេសជ្ជៈមួយចំនួន
ជាក់ស្តែង ការញ៉ាំភេសជ្ជៈដែលត្រជាក់ និងមានជាតិស្ករអាចជួយឲ្យកូនកម្រើកបាន ប៉ុន្តែសម្រាប់ម៉ាក់ដែលមានជំងឺទឹកនោមផ្អែមពេលពពោះគួរកាត់បន្ថយការញ៉ាំជាតិស្ករដើម្បីគ្រប់គ្រងស្ថានភាពសុខភាព។ ជាមួយគ្នានេះដែរ ស្រ្តីពពោះក៏អាចញ៉ាំទឹកត្រជាក់ធម្មតាជំនួសឲ្យភេសជ្ជៈដែលមានជាតិស្ករបានផងដែរ។
២. ញ៉ាំអាហារសម្រន់
ទន្ទឹមនឹងនេះដែរ ប្រសិនបើទារកក្នុងផ្ទៃនៅតែមិនកម្រើកក្រោយពីញ៉ាំទឹកត្រជាក់ៗរួច ម៉ាក់ៗក៏អាចញ៉ាំអាហារសម្រន់តិចតួច ដើម្បីដាស់ឲ្យអាអូនភ្ញាក់។ អាហារសម្រន់ដែលមានកាបូអុីដ្រាត និងប្រូតេអ៊ីនដូចជាគ្រាប់ធញ្ញជាតិជាដើម អាចដោះស្រាយបញ្ហាមួយនេះបាន។
៣. ធ្វើចលនា
បើយើងចង់ឲ្យកូនកម្រើកយ៉ាងស្វាហាប់ម៉ាក់ក៏ត្រូវតែធ្វើចលនាដូចគ្នា ដូចជាការដើរជុំវិញផ្ទះ។ល។សកម្មភាពមួយនេះ អាចជួយដាស់ឲ្យទារកដែលកំពុងគេងភ្ញាក់ឡើងនិងកម្រើកឡើងវិញ។
៤. ផ្លាស់ប្តូរឥរិយាបថ
ក្នុងករណីដែលយើងកំពុងតែគេង ម៉ាក់អាចប្រែខ្លួនចុះឡើង ហើយបើសិនជាកំពុងតែឈរ អាចសាកល្បងងើបអង្គុយដដែលៗ ពីព្រោះការផ្លាស់ប្តូរឥរិយាបថអាចជួយឲ្យអាអូនចាប់ផ្តើមធាក់ម្តងទៀត។
៥. ស្ទាបអង្អែលពោះ
មួយវិញទៀត យើងក៏អាចយកដៃស្ទាបអង្អែលពោះ ឬចុចថ្នមៗនៅលើពោះ ដើម្បីជំរុញឲ្យកូនកម្រើក ហើយនៅពេលដែលឃើញជើងអាអូនធាក់ម៉ាក់អាចចុចភ្លាមៗ ដើម្បីឲ្យកូនធាក់កាន់តែខ្លាំង។
៦. ស្តាប់តន្រ្តី ឬជជែកលេងជាមួយកូន
ម៉ាក់ដឹងអត់ថាទារកក្នុងផ្ទៃអភិវឌ្ឍសមត្ថភាពក្នុងការស្តាប់នៅក្នុងផ្ទៃនៅចន្លោះសប្តាហ៍ទី១៨ ដូចជាសម្លេងចង្វាក់បេះដូងឬម៉ាក់កូរពោះ ហើយកូនអាចឮសំឡេងពីខាងក្រៅនៅចន្លោះសប្តាហ៍ទី២៨។ នៅពេលដែលម៉ាក់និយាយ ឬច្រៀងឲ្យកូនស្តាប់ទារកក្នុងផ្ទៃដែលកំពុងតែលង់លក់ អាចចាប់ផ្តើមកម្រើកភ្លាមៗ។
មូលហេតុមួយចំនួនដែលអាចធ្វើឲ្យទារកក្នុងផ្ទៃមិនសូវកម្រើក
មានកត្តាជាច្រើនដែលអាចនាំឲ្យទារកមិនសូវកម្រើកដែលមិនបង្កផលប៉ះពាល់ណាមួយដល់បេប៊ីឡើយ។ ទោះជាយ៉ាងនេះក្តី ប្រសិនបើម៉ាក់សង្កេតឃើញថា នៅសុខៗទារកលែងសូវកម្រើកដូចមុនទោះជាម៉ាក់អនុវត្តគ្រប់វិធីហើយនោះ គួរទៅពិគ្រោះយោបល់ជាមួយនឹងគ្រូពេទ្យភ្លាមៗពីបញ្ហាមួយនេះ។
ទារកក្នុងផ្ទៃមិនសូវកម្រើកដូចមុនអាចបណ្តាលមកពីកត្តាខាងក្រោម៖
- ម៉ាក់ៗរួមភេទអំឡុងពេលពពោះ
- ទារកក្នុងផ្ទៃគេងលក់
- កូនធំពេកពិបាកក្នុងការធ្វើចលនា
- កូនកំពុងតែត្រៀមខ្លួនក្នុងការសម្រាល
- កូននៅតូចពេកអំឡុងត្រីមាសទី២ ទើបម៉ាក់ៗមិនអាចទទួលអារម្មណ៍ដឹងបាន។
ដើម្បីស្វែងយល់បន្ថែមពីអាហារដែលសម្បូរដោយជីវជាតិ និងសារធាតុចិញ្ចឹម ដែលជួយឲ្យកូនរបស់លោកអ្នក មានការលូតលាស់ល្អក៏ដូចជា ជួយដល់ការអភិវឌ្ឍខួរក្បាលរបស់ពួកគេ សូមចុចទីនេះ ឬ លោកអ្នកអាចចុះឈ្មោះជាសមាជិក កូនឆ្លាតក្លឹប បានដើម្បីទទួលបានវត្ថុអនុស្សាវរីយ៍ សៀវភៅអប់រំ និងការប្រឹក្សាយោបល់ដោយឥតគិតថ្លៃបាន។
បញ្ជាក់៖ រាល់ព័ត៌មានដែលវេបសាយយើងចេញផ្សាយចែករំលែកចំណេះដឹងប៉ុណ្ណោះ ហើយព័ត៌មានទាំងនោះ មិនអាចជំនួសដំបូន្មានពីពេទ្យជំនាញ ចំពោះស្ថានភាពសុខភាពជាក់ស្ដែងរបស់អ្នកជំងឺឡើយ។ ដូច្នេះមិនត្រូវបោះបង់ មិនស្ដាប់ដំបូន្មាន ពន្យារពេល ឬមិនទៅជួបពិគ្រោះយោបល់ជាមួយគ្រូពេទ្យ ដោយសារអ្នកបានអានព័ត៌មានណាមួយលើវិបសាយនេះឡើយ។ រាល់ពេលចាប់ផ្ដើមវិធីសាស្ត្រព្យាបាលណាមួយ ត្រូវប្រាកដថា បានពិគ្រោះ និងទទួលការអនុញ្ញាតពីគ្រូពេទ្យជំនាញ៕
អត្ថប្រយោជន៏ចូលរួមកូនឆ្លាតក្លឹប
- វិធីសាស្រ្ត និងគន្លឹះផ្សេងៗតាមដំណាក់កាលនិមួយៗ សម្រាប់ដំណើរភាពជាអ្នកម្តាយ
- កាដូអនុស្សាវរីយ៍ និងសៀវភៅអប់រំសម្រាប់អ្នកម្តាយពពោះ និងអ្នកម្តាយដែលមានកូនគ្រប់ ២ឆ្នាំ
- ការពិគ្រោះជាមួយអ្នកប្រឹក្សាយោបល់ពីកូនឆ្លាតក្លឹប
