របបអាហារសំខាន់ៗដែលកូនតូចចាប់ពីអាយុ ៦ ខែត្រូវការ

បន្ទាប់ពីអាយុ ៦ ខែ ម៉ាក់ៗគួរឱ្យអូនតូចញុំាអាហារបន្ថែមក្រៅតែពីការបំបៅដោះ ព្រោះ​ក្នុង​ដំណាក់​កាលនេះកូនត្រូវការសារជាតិចិញ្ចឹមបន្ថែមដើម្បីលូតលាស់ និងអភិវឌ្ឍរាងកាយ។ ដើម្បីឱ្យកូនលូតលាស់បានល្អ មិនសូវឈឺ អាហារបន្ថែមរបស់កូនចាប់ពីអាយុ​បាន​​៦ខែ​ គួរមានសាររជាតិចិញ្ចឹម​សំខាន់​ៗ​ដូច​ខាងក្រោមនេះ៖

១. កាល់ស្យូម​

កាល់ស្យូម​មិនត្រឹមតែជួយឱ្យធ្មេញ និងឆ្អឹងកូនលូតលាស់បានល្អនិងរឹងមាំទេ ថែមទាំងជួយ​​បញ្ចៀស​ការ​​បាក់​ឆ្អឹង​​​ នៅ​ពេល​ដែល​កូនដួល និងជំងឺឆ្អឹងទន់ដែលអាចធ្វើឱ្យកូនកោងជើង។ ​បន្លែបៃតង គ្រាប់ល្ង និង​សណ្តែក ជាដើម​សុទ្ធ​តែសម្បូរទៅដោយកាល់ស្យូម។

២. អាស៊ីដអូមេហ្កា​៣

អាស៊ីដខ្លាញ់អូមេហ្កា ៣ ជួយឱ្យកូនអភិវឌ្ឍខួរក្បាល និងភ្នែកបានល្អ។ ម៉ាក់ៗអាចបញ្ចូលស៊ុត ប្រេងអូលីវ ផ្លែបឺរ បន្លែបៃតង ត្រីសាឌីន និង​ត្រីសាល់ម៉ុនជាដើម ទៅក្នុងរបបអាហារកូន ព្រោះអាហារទាំងនេះ​សម្បូរ​អាស៊ីដ​ខ្លាញ់​អូមេហ្កា ៣។

៣. ជាតិ​ដែក​

រាងកាយកូនត្រូវការជាតិដែកដើម្បីផលិតគ្រាប់ឈាមក្រហម ដែលមានមុខងារដឹកនាំអុកស៊ីសែន និងសារធាតជាតិចិញ្ចឹមទៅគ្រប់កោសិកា។ ដូចនេះ បើកូនខ្វះ​ជាតិ​ដែក ការផលិតគ្រាប់ឈាម​ក្រហម​ក៏ថយចុះ ពេលនោះកូននឹងខ្វះសារជាតិចិញ្ចឹមបណ្តាលឱ្យលូតលាស់​យឺត​ខ្សោយបេះដូង និង​ប៉ះពាល់ដល់ការ​អភិវឌ្ឍ​ខួរ​ក្បាល។ ជាតិ​ដែក​សម្បូរក្នុងអាហារដូចជា ស៊ុត សាច់ក្រហម បន្លែ​បៃតង និង​ដំឡូងជ្វា។

៤. ស័ង្កសី

ស័ង្កសីគឺជាសារធាតុរ៉ែដែលជួយដល់មុខងារប្រព័ន្ធភាពស៊ាំ ជួយរាងកាយផលិតប្រូតេអ៊ីន និងជួយ​ឱ្យ​របួស​ឆាប់​ជា។ អាហារផ្ទុកស័ង្កសីខ្ពស់រួមមានគ្រឿងសមុទ្រ សាច់ក្រហម គ្រាប់ធញ្ញជាតិ និង​គ្រាប់ផ្លែឈើ។

៥. វីតាមីន​ផ្សេង​ៗ​

​វីតាមីន​​សំខាន់​ៗ​ដូចជា​វីតាមីន​ A C និង D មាន​គុណប្រយោជន៍​ជួយ​ដល់​ការ​លូតលាស់​ និងជួយឱ្យកូនមាន​សុខភាព​ល្អ​។​វីតាមីន​A ដែល​មាន​នៅ​ក្នុង​ដំឡូង​ជ្វា​ ការ៉ុត​ ល្ពៅ និងល្ហុង​ជាដើម​ជំនួយ​​សុខភាព​ស្បែក​និង​ភ្នែក​កូន។​ ចំណែក​ឯ​វីតាមីន​C ​ជា​សារធាតុ​ប្រឆាំង​នឹង​អុកស៊ីតកម្ម ជួយការពារកូនពីជំងឺផ្សេងៗ​ដោយពង្រឹង​ប្រព័ន្ធ​ការពាររាងកាយកូន​និងជួយឱ្យស្បែកកូនស្រស់ថ្លា ហើយ​​មាន​នៅ​ក្នុង​អាហារ​ដូចជា​ផ្លែ​ក្រូច​ ល្ហុង និង​ប៉េងប៉ោះ​​។​​​​​រី​ឯ​វីតាមីន ​D ដែល​មាន​នៅ​ក្នុង​តៅហ៊ូ ផ្សិត ស៊ុតក្រហម ជួយឱ្យរាងកាយកូនស្រូបកាល់ស្យូម​បាន​ល្អ​ដែលជួយ​ឱ្យឆ្អឹង និងធ្មេញកូន​រឹងមាំ ។​

​យ៉ាងណា​ម៉ាក់​ត្រូវ​ដឹង​ថា អាហារបន្ថែមដំបូងសម្រាប់កូនអាយុចាប់ពី ៦ ខែឡើងទៅត្រូវមានលក្ខណៈជ្រាយ ទន់ ម៉ដ្ឋ ផុយ និងឆ្អិនល្អ។

ដើម្បី​ស្វែង​យល់​បន្ថែម​ពី​អាហារ​ដែល​សម្បូរ​ដោយ​ជីវជាតិ និងសារធាតុ​ចិញ្ចឹម​ ដែល​ជួយ​ឲ្យ​កូន​របស់​លោក​អ្នក មាន​ការ​លូត​លាស់​ល្អ​ក៏ដូច​ជា ជួយ​ដល់​ការ​អភិវឌ្ឍរាងកាយ​របស់​ពួកគេ លោក​អ្នក​អាចចុះឈ្មោះជាសមាជិក កូន​ឆ្លាត​ក្លឹប បានដើម្បីទទួលបានវត្ថុអនុស្សាវរីយ៍ សៀវភៅអប់រំ និងការប្រឹក្សាយោបល់ដោយឥតគិតថ្លៃបាន។

បញ្ជាក់៖ រាល់ព័ត៌មានដែលវេបសាយយើងចេញផ្សាយចែករំលែកចំណេះដឹងប៉ុណ្ណោះ ហើយព័ត៌មានទាំងនោះ មិនអាចជំនួសដំបូន្មានពីពេទ្យជំនាញ ចំពោះស្ថានភាពសុខភាពជាក់ស្ដែងរបស់អ្នកជំងឺឡើយ។ ដូច្នេះមិនត្រូវបោះបង់ មិនស្ដាប់ដំបូន្មាន ពន្យារពេល ឬមិនទៅជួបពិគ្រោះយោបល់ជាមួយគ្រូពេទ្យ ដោយសារអ្នកបានអានព័ត៌មានណាមួយលើវិបសាយនេះឡើយ។ រាល់ពេលចាប់ផ្ដើមវិធីសាស្ត្រព្យាបាលណាមួយ ត្រូវប្រាកដថា បានពិគ្រោះ និងទទួលការអនុញ្ញាតពីគ្រូពេទ្យជំនាញ៕