ពេលកូនជុះច្រើនដងក្នុងមួយថ្ងៃ ហើយលាមករាវដូចទឹកទៀតនោះ បានន័យថាកូនមានជំងឺរាកហើយ។ រាកជាជំងឺទូទៅមួយកើតលើកុមារ ហើយវាអាចបាត់ទៅវិញក្នុងរយៈពេលមួយថ្ងៃ ឬពីរថ្ងៃ។ បើសិនជាកូនមានជំងឺរាកអូសបន្លាយយូរជាងពីរថ្ងៃ អាចថាកូនមានបញ្ហាសុខភាពផ្សេងទៀត ហើយម៉ាក់ប៉ា គួរនាំកូនទៅជួបគ្រូពេទ្យ។
១. មូលហេតុបង្កជំងឺរាកលើកុមារ
ជំងឺរាកអាចបង្កដោយមូលហេតុច្រើនយ៉ាង មានដូចជា៖
- ឆ្លងបាក់តេរី ឬវីរុស
- បញ្ហាប្រព័ន្ធរំលាយអាហារ
- អាលែកហ្ស៊ីនឹងចំណីអាហារ
- ឆ្លងប៉ារ៉ាស៊ីតពីទឹក ឬអាហារ
- រលាកពោះវៀន
បើសិនជាកូនមានរោគសញ្ញារាកធ្ងន់ធ្ងរនោះមានន័យថាកូនអាចមានជំងឺផ្សេងមួយទៀត។ ម៉ាក់ប៉ាគួរប្រញាប់នាំកូនទៅជួបគ្រូពេទ្យ បើសិនជារោគសញ្ញារាកមិនអន់ថយ ឬកូនមានអាការៈឈឺពោះខ្លាំង ក្អួត ក្ដៅខ្លួនខ្លាំង ស្ងួតមាត់ និងយំមិនចេញទឹកភ្នែក ជាដើម។ដូចគ្នានេះដែរ បើបញ្ហារាកធ្វើឲ្យកូនឈប់ធ្វើសកម្មភាពប្រចាំថ្ងៃផ្សេងៗ ក៏ត្រូវនាំកូនទៅជួបពេទ្យដូចគ្នាដែរ។
២. ដំណោះស្រាយបញ្ហារាកលើកុមារ
ការព្យាបាលជំងឺរាកលើកុមារ គឺអាស្រ័យលើរោគសញ្ញា អាយុ និងស្ថានភាពសុខភាពជាក់ស្ដែង និងកម្រិតធ្ងន់ធ្ងរនៃរោគសញ្ញារាក។ ការបាត់បង់ជាតិទឹកជាកង្វល់ធំមួយសម្រាប់ក្មេងដែលមានបញ្ហារាក។ ជាទូទៅការព្យាបាលជំងឺរាក គឺត្រូវផ្ដល់ជាតិទឹកដល់កូនឲ្យបានគ្រប់គ្រាន់ ព្រោះថាពេលរាក ក្មេងនឹងបាត់បង់ជាតិទឹកច្រើនពីរាងកាយ។
ម៉ាក់ប៉ាគួរអនុវត្តតិចនិកទាំងនេះពេលកូនមានបញ្ហារាក៖
- ត្រូវបំបៅដោះកូនឲ្យបានញឹកញាប់
- បើកូនបៅទឹកដោះគោម្សៅ ត្រូវបន្តឲ្យកូនបៅ មិនត្រូវអាក់ខាននោះទេ
- ផ្ដល់អាហារសម្បូរជាតិទឹកដល់កូន ដូចជាទឹកដូង
- ឲ្យកូនញ៉ាំអូរ៉ាលីតដែលផ្សំឡើងពីទឹក អំបិល និងស្ករ ជួយបំពេញជាតិទឹកក្នុងខ្លួនកូន និងអាចរកទិញបានដោយមិនត្រូវការវេជ្ជបញ្ជា
- កុំឲ្យកូនផឹកភេសជ្ជៈកំប៉ុង ព្រោះអាចធ្វើឲ្យបញ្ហារាកកាន់តែធ្ងន់ធ្ងរ
៣. វិធីបង្ការកុំឲ្យកូនរាក
ការលាងសម្អាតដៃកូនឲ្យបានស្អាតជាប្រចាំជួយកាត់បន្ថយការឆ្លងមេរោគដែលបណ្ដាលឲ្យរាក។ ដូចគ្នាដែរ ម៉ាក់ៗអាចស្វែងរកវ៉ាក់សាំងបង្ការជំងឺរាកចាក់ឲ្យកូន ដើម្បីការពារពីបញ្ហារាកបង្កដោយ rotaviruses។
ក្រៅពីនេះនៅមានតិចនិកមួយចំនួនទៀត ដែលប៉ាម៉ាក់គួរអនុវត្តដើម្បីការពារកូនដែរ៖
- ឲ្យកូនញ៉ាំទឹកស្អាត ឬទឹកដាំពុះល្អ
- កុំឲ្យកូនញ៉ាំបន្លែឆៅ ឬសាច់មិនឆ្អិនល្អ
- កុំឲ្យកូនញ៉ាំអាហារលក់តាមផ្លូវផ្ដេសផ្ដាសដែលមើលទៅគ្មានអនាម័យ
Source: Hello Krupet
